Gwamnatin Namibia ta ƙi amincewa da buƙatar lasisi da kamfanin Starlink na Elon Musk ya gabatar domin fara aiki a ƙasar, lamarin da ya zama wata babbar tangarda ga kamfanin a yankin kudancin Afirka. Hukumar sadarwa ta ƙasar (CRAN) ta tabbatar da wannan mataki, tana mai cewa reshen kamfanin a cikin gida bai cika ka’idojin mallakar hannun jari ba.
Dokokin Namibia sun tanadi cewa aƙalla kashi 51 cikin ɗari na kamfanin sadarwa dole ne ya kasance mallakin ’yan ƙasar ko kamfanonin cikin gida. Wannan na daga cikin manufofin da ƙasar ta kafa tun bayan samun ’yancin kai a 1990, domin ƙarfafa kasuwancin cikin gida da rage rashin daidaito. Duk da cewa Starlink ta ce ta shirya kafa kamfani na cikin gida da zai samar da ayyukan yi, har yanzu ba ta cika sharuddan ba.
Kamfanin bai fitar da wata sanarwa kai tsaye ba kan wannan hukunci, amma yana fuskantar irin waɗannan matsalolin doka a wasu ƙasashen Afirka, musamman a Afirka ta Kudu, inda irin wannan dokar mallaka ta hana shi shiga kasuwa. A baya ma, a 2024, an zargi Starlink da yin aiki ba tare da lasisi ba a Namibia, inda aka umarce ta ta dakatar da ayyukanta nan take.
Duk da haka, akwai yiwuwar sake duba wannan hukunci cikin kwanaki 90 idan an shigar da ƙorafi. A gefe guda kuma, hukumomin Afirka ta Kudu sun jaddada cewa dokokin mallaka suna aiki ga kowa, tare da nuna cewa kamfanoni da dama daga Amurka suna aiki a ƙasar cikin bin doka. Wannan rikici ya kuma kara janyo cece-kuce sakamakon ra’ayoyin siyasa da Elon Musk ke furtawa a duniya.
