Mutane biyu sun rasa rayukansu bayan da wani ƙaramin jirgin sama ya yi hatsari sannan ya kama da wuta a yankin Tema Community One da ke Greater Accra a Ghana ranar Litinin. Rahotanni sun nuna cewa jirgin ya fara kamawa da wuta tun a sararin samaniya kafin ya faɗi a filin wasa na makarantar Oninku Drive School, kusa da TMA Daycare.
Jami’an ‘yansanda da na hukumar kashe gobara sun isa wurin cikin gaggawa domin shawo kan lamarin, inda suka samu nasarar kashe wutar tare da killace yankin. An bayyana cewa an riga an kwashe malamai da ɗaliban makarantar da ke kusa da wurin kafin hatsarin ya faru, abin da ya hana samun asarar rayuka a tsakanin yara.
Shaidu daga mazauna yankin sun ce sun ga jirgin yana shawagi kafin ya faɗo kwatsam, lamarin da ya haifar da wata babbar gobara. Jami’an tsaro sun kuma tabbatar da cewa suna aiki tare da sauran hukumomi domin tabbatar da tsaro a yankin.
A halin yanzu, hukumomin binciken hatsarin jiragen sama sun fara shirye-shiryen bincike domin gano musabbabin faruwar lamarin, inda ake sa ran za a tattara tarkacen jirgin domin yin cikakken nazari.
