Birnin Bamako, babban birnin Mali, ya samu ƙarin man fetur a ‘yan kwanakin nan bayan an shafe makonni ana fama da ƙarancin mai saboda takunkumin da ‘yan ta’adda suka sa wa motocin da ke jigilar mai zuwa wannan ƙasar da ba ta da teku.
Tun daga watan Satumba, ‘yan ta’adda daga wata ƙungiya da ke da alaƙa da Al-Qaeda suka toshe hanyoyin jigilar mai zuwa wasu birane, lamarin da ya raunana tattalin arzikin ƙasar da ke Yammacin Afirka.
Sai dai, yan jaridar AFP sun lura cewa har yanzu ba a samun isashiyar wutar lantarki idan aka kwatanta da matakin da ake samu kafin katsewar.
Yawancin gundumomin Bamako na samun wutar kusan sa’o’i shida ne a kowace rana.
Sufuri ya koma yadda yake
A halin yanzu, layukan dogayen motoci a gidajen mai da suka zama ruwan dare a babban birnin sun ragu a ‘yan kwanakin da suka gabata.
“Layin a nan ya yi tsawon aƙalla kilomita biyu. Amma a yanzu jiran da na yi bai wuce na mintoci kaɗan ba kafin na sha mai,” in ji wani direba a tattaunawarsa da kamfanin dillancin labarai na AFP a ranar Juma’a inda ya buƙaci a sakaya sunansa.
Yan jaridan AFP sun ruwaito cewa zirga-zirgar motoci kusan ta koma yadda take a baya, ko da yake wasu tashoshin mai da suka rufe a farkon katsewar ba su sake buɗewa ba.
“Muna fatan an warware matsalar gaba ɗaya,” in ji wani mazaunin Bamako.
Taimakon sojoji
An fara dawo da zirga-zirgar tankunan mai kamar yadda ake yi a baya a Bamako saboda saboda yadda sojoji suke yi wa tankunan na mai rakiya.
Wasu daga cikinsu sun iso tare da sojojin daga Nijar, wadda ƙawar Mali ce.
Wata majiya ta tsaro ta ce samuwar man fetur a Mali a halin yanzu ya samo asali ne sakamakon ayyukan da sojoji ke yi da kuma ƙoƙarin sojin na daƙile takunkumin hana jigilar mai.
