Kwamitin tsaron ƙasa na Majalisar Dokokin Isra’ila ya amince da wani daftarin doka da zai ba da damar aiwatar da hukuncin kisa kan fursunonin Falasɗinawa. Ana sa ran za a kai ƙudirin zauren majalisar a mako mai zuwa domin karatu na biyu da na uku, waɗanda su ne matakai na ƙarshe kafin ya koma doka.
Rahotanni sun nuna cewa an yi wasu gyare-gyare ga ƙudirin, ciki har da yiwuwar aiwatar da hukuncin ta hanyar rataya. Haka kuma, waɗanda aka yanke wa hukuncin za a killace su a wata cibiyar ajiye fursunoni ta musamman, inda ziyara za ta kasance da tsauraran sharudda, kuma tuntuɓar lauya ma za ta takaita ne ta hanyar bidiyo kawai. Ƙudirin ya kuma tanadi cewa dole ne a aiwatar da hukuncin cikin kwanaki 90 bayan yanke shi.
Wani muhimmin ɓangare na ƙudirin shi ne cewa ba lallai sai masu gabatar da ƙara sun nemi hukuncin kisa ba, kuma ba sai dukkan alƙalai sun amince gaba ɗaya ba kafin a yanke hukuncin, domin rinjayen alƙalai kaɗai zai iya isa. Ga Falasɗinawan da ke ƙarƙashin mamayar Isra’ila, ƙudirin ya ce ba za su samu damar afuwa ko ɗaukaka ƙara ba, yayin da fursunonin da aka yi wa shari’a a cikin Isra’ila za a iya sauya musu hukuncin zuwa ɗaurin rai da rai.
Ministan tsaron Isra’ila mai ra’ayin riƙau, Itamar Ben-Gvir, ya bayyana wannan mataki a matsayin rana mai tarihi. Sai dai tun bayan fara yaƙin Gaza a watan Oktoban 2023, an rika zargin Isra’ila da tsananta cin zarafin fursunonin Falasɗinawa, tare da rahotannin da ƙungiyoyin kare haƙƙin bil’adama suka fitar kan azabtarwa, yunwa, da hana kulawar lafiya.
