Wani jirgin ruwa mallakar Turkiyya da ke jiran wucewa kusa da Iran ya samu izinin ratsa mashigar Hormuz bayan hukumomin Iran sun amince da hakan. Ministan sufuri da abubuwan more rayuwa na Turkiyya, Abdulkadir Uraloglu, ya ce jirgin ya wuce ta hanyar tashar jiragen ruwan Iran bayan samun izinin hukuma.
Uraloglu ya bayyana cewa akwai jiragen ruwa 15 masu ɗauke da tutar Turkiyya da ke yankin, kuma gwamnatin Ankara na ci gaba da tattaunawa da jami’an Iran domin tabbatar da lafiyar su.
A cewarsa, jimillar ma’aikatan jiragen ruwa na Turkiyya a yankin sun kai 171.
Rikicin da ke gudana tsakanin Amurka, Isra’ila da Iran ne ya haifar da matsalar rufe mashigar Hormuz, lamarin da ya sa tankunan mai da sauran jiragen ruwa suka makale a yankin.
Wannan ya ƙara haifar da damuwa game da wadatar makamashi a kasuwannin duniya.
A lokaci guda kuma, kamfanonin jiragen sama na Turkiyya sun soke yawancin tashin jiragensu zuwa ƙasashen yankin Gabas ta Tsakiya saboda matsalar tsaro. An kuma karkatar da jirage 76 zuwa Turkiyya tun bayan fara rikicin a ranar 28 ga Fabrairu.
