Ƙungiyar Falasɗinawa Hamas ta yi kira ga Iran da ta guji kai hari kan ƙasashen makwabta, duk da cewa ta jaddada haƙƙin Tehran na kare kanta daga hare-haren Israel da United States. A wata sanarwa da ta fitar a ranar Asabar, ƙungiyar ta bukaci Iran ta yi taka-tsantsan domin kada rikicin ya ƙara faɗaɗa a yankin.
Wannan kira ya zo ne a wani yanayi da ba a saba gani ba daga Hamas, wadda ta kuma bukaci ƙasashen duniya su ɗauki matakai domin kawo ƙarshen yaƙin da ya mamaye yankin Gabas ta Tsakiya tun ranar 28 ga Fabrairu. Ƙungiyar ta ce tana goyon bayan Iran wajen mayar da martani ga hare-haren da ake kai mata, amma ta jaddada cewa ya kamata a guji kai hari kan ƙasashen da ke makwabtaka da ita.
Hamas ta kuma tunatar da yadda ta yi tir da kisan jagoran addinin Iran, Ali Khamenei, a farkon rikicin, tana mai cewa ya kasance yana goyon bayan gwagwarmayar Falasɗinawa ta fuskar siyasa, diflomasiyya da kuma soja.
Wani jami’in Hamas ya shaida cewa ƙungiyar na tattaunawa da jami’an Iran kan lamarin, yana mai zargin cewa Isra’ila na ƙoƙarin haddasa rikici tsakanin Iran da ƙasashen Larabawa da Musulmi. Duk da haka, rikicin ya ci gaba da tsananta yayin da Iran ke mayar da martani ga hare-haren Amurka da Isra’ila ta hanyar harba makamai masu linzami zuwa wasu ƙasashe a yankin.
Majiyar Labari: NEWSTIMEHUB
