Serikali ya Guinea-Bissau imepunguza kwa kiasi vikwazo dhidi ya shughuli za vyama vya siasa vilivyowekwa kufuatia mapinduzi ya kijeshi mwaka mmoja uliopita, lakini haijaruhusu kufanyika kwa mikutano ya hadhara.
Amri hiyo ya kupunguza vikwazo dhidi ya shughuli za vyama vya siasa itaanza kutumika tarehe 24 Novemba, kulingana na taarifa iliyotolewa na uongozi wa juu wa jeshi siku ya Ijumaa.
Vyama hivyo vitaweza kuendelea na baadhi ya mikutano, lakini lazima viufahamishe uongozi wa juu wa jeshi kabla ya kufanya hivyo, msemaji wa jeshi, Kanali Jaime Valentin, aliambia shirika la habari la AFP.
Kanuni hizo mpya haziruhusu “mikutano ya hadhara ya kisiasa, maandamano, na migomo ya mitaani,” alisema.
‘Uendeshaji wa mashirika ya kisiasa’
“Hatua hii inalenga hasa kuhakikisha kuwa mashirika ya kisiasa yanaweza kuendesha shughuli zake bila kuhatarisha usalama wa taifa na utulivu wa umma,” ilieleza taarifa hiyo.
Kiongozi wa Guinea-Bissau aliyeondolewa madarakani, Umaro Sissoco Embalo, aliambia AFP kuwa anatarajia kurejea kutoka uhamishoni nchini Morocco ili kushiriki katika uchaguzi, lakini serikali imesema kuwa “mazingira ya kiusalama” hayajakidhiwa kwa ajili ya kurejea kwake.
Baadhi ya washirika wa karibu wa Embalo wameondolewa katika nyadhifa muhimu serikalini.
