Gwamnatin Ghana ta ƙaddamar da bincike a faɗin ƙasar kan zargin gurɓatar chips na ayaba (plantain chips) da filastik bayan wasu bidiyo da suka bazu a shafukan sada zumunta.
Bidiyon sun nuna wasu masu sarrafa abinci suna zuba wani nau’in filastik cikin man zafi yayin soyawa domin sa chips ɗin su zama masu ƙyalli kuma su daɗe ba tare da lalacewa ba.
Hukumar kula da ingancin abinci da magunguna ta Ghana (FDA) ta ce ta fara sa ido a kasuwanni da kuma gwaje-gwajen dakin bincike domin tabbatar da gaskiyar zargin.
A cewar rahotanni, ana zargin wasu masu sarrafa abinci da narkar da filastik irin Low-Density Polyethylene (LDPE) a cikin man soya.
Hukumar ta bayyana cewa irin wannan aiki na nufin gurɓatar abinci da sinadarai masu haɗari, wanda ke sa abincin ya zama mara lafiya ga mutane. Ta yi gargadi cewa narkar da filastik a cikin mai na iya fitar da sinadarai masu illa kamar plasticizers da phthalates da za su iya shiga cikin abincin.
Hukumomi sun ce suna aiki tare da jami’an gwamnati na yankuna da kuma ‘yan sanda domin sa ido kan masu sayar da irin waɗannan kayayyaki tare da tabbatar da bin dokokin tsaron abinci. FDA ta ce za ta bayyana sakamakon gwaje-gwajen dakin bincike ga jama’a bayan kammala binciken.
