Fiye da mutane 200 sun mutu sakamakon ruftawar wani wurin haƙar ma’adinin coltan a Rubaya, a gabashin Jamhuriyar Dimokuraɗiyyar Kongo, a cewar wani jami’in gwamnati na yankin.
Lubumba Kambere Muyisa, mai magana da yawun gwamnan lardin da ‘yan tawaye suka naɗa inda ma’adinan yake, ya shaida wa kamfanin dillancin labarai na Reuters a ranar Jumma’a cewa mutuwar ta faru ne tun farkon wannan makon.
Rugujewar ta auku ne a wani wurin haƙar ma’adinai na gargajiya kusa da garin Rubaya, wani yanki da aka sani da wadataccen arzikin coltan, wani nau’in ƙarfe da ake amfani da shi wajen ƙera wayoyin hannu da sauran na’urorin lantarki.
Tarihin hatsarori
Wannan lamari ya nuna ƙaruwar adadin mace-mace sosai idan aka kwatanta da ruftawa irin wannan da ta faru a wannan yankin na ma’adinai a Yunin 2025, inda aƙalla mutane 12 suka mutu.
A wancan lokaci, majiyoyi sun ce ɗumbin masu haƙar ma’adinai sun samu tserewa daga ramin lokacin da ya rufta, kuma ba a gano ainihin dalilin hatsarin nan take ba.
Hatsarorin ma’adinai suna yawan faruwa a gabashin DRC, inda ƙa’idojin tsaro ke da rauni sosai, kuma wurin haƙar ma’adinai na gargajiya kan yi aiki a ramuka marasa ƙarfi ba tare da kayan kariya ba.
