Majalisar Dinkin Duniya ta bayyana cewa sama da ‘yan gudun hijira ‘yan Kongo 33,000 da suka tsere zuwa Burundi sun riga sun koma yankin gabashin Jamhuriyar Dimokuraɗiyyar Kongo (DRC), tun bayan sake buɗe iyakar kasashen biyu a ranar 23 ga Fabrairu 2026. Yawancin masu dawowa na ratsa ta mashigar Kavimvira kusa da Uvira a lardin South Kivu.
Wadannan mutane sun tsere ne a ƙarshen shekarar 2025 sakamakon rikici tsakanin sojojin gwamnatin Kongo da ƙungiyar ‘yan tawaye ta M23, wanda ya tilasta dubban jama’a barin gidajensu. Sai dai bayan dawowar wani ɗan kwanciyar hankali a yankin Uvira da kuma sake buɗe iyaka, da dama sun fara komawa gida, duk da cewa har yanzu ana fuskantar rashin tabbas.
Hukumar kula da ‘yan gudun hijira ta Majalisar Dinkin Duniya ta ce ƙarancin tallafin kuɗi a Burundi ya rage yawan agajin da ake bayarwa, abin da ya sa wasu daga cikin ‘yan gudun hijira suka yanke shawarar komawa gida. A lokaci guda, an kiyasta cewa fiye da mutane 100,000 sun tsere zuwa Burundi kafin fara komawar.
Rikicin dai na da alaka da ci gaba da hare-haren ƙungiyar M23 a gabashin Kongo, wacce ake zargin tana samun goyon bayan Rwanda—zargi da Rwanda ke musantawa. Wannan rikici ya ci gaba da jawo tashin hankali a yankin duk da yunkurin dawo da zaman lafiya.
Majiyar Labari: AA
