Gwamnatin Nijeriya ta ce Gwamnatin Amurka ta tabbatar da shirinta na ƙarfafa haɗin gwiwar tsaro da Nijeriya, wanda ya haɗa da samar da ƙarin tallafin bayanan sirri, kayan tsaro, da sauran kayayyakin yaƙi domin ƙarfafa ayyukan yaƙi da ‘yan ta’adda da ƙungiyoyin masu tsattsauran ra’ayi a cikin ƙasar.
Wannan ya biyo bayan tattaunawa da muhawarar da aka gudanar a makon da ya gabata tsakanin tawagar manyan jami’an Nijeriya da jami’an Amurka, domin ƙarfafa dangantakar tsaro tsakanin ƙasashen biyu da kuma buɗe sabbin hanyoyin haɗin gwiwa.
Tawagar, ƙarƙashin jagorancin Babban Mai Ba wa Shugaban Ƙasa Shawara kan Tsaro na Ƙasa, Nuhu Ribadu, ya gana da manyan jami’a a ƙasar a ɓangarori daban-daban da suka haɗa da Majalisar Dokokin Amurka, Ofishin Bangaren Addinin Fadar White House, Ma’aikatar Harkokin Waje, Majalisar Tsaro ta Ƙasa, da Ma’aikatar Yaƙi.
Mambobin tawagar sun haɗa da Antoni Janar na Tarayya, Lateef Fagbemi; Shugaban Ma’aikatan Tsaro, Janar Olufemi Oluyede; Shugaban Sashen Leken Asiri na Tsaro, Laftanal Janar Emmanuel Undiandeye; Sufeto Janar na ‘Yan Sanda, Kayode Egbetokun; da wakilai biyu daga Ofishin Mai Ba da Shawara kan Tsaro na Ƙasa.
Yayin ganawar da aka yi a Washington, DC, tawagar Nijeriya ta ƙaryata zargin kisan kiyashi a Nijeriya, tana jaddada cewa hare-haren tashin hankali suna shafar iyalai da al’ummomi a dukkan ɓangarorin addini da kabilu, kamar yadda wata sanarwa da Mashawarci na Musamman ga Shugaban Ƙasa Bola Tinubu kan Bayar da Bayanai da Tsara Dabaru, Bayo Onanuga ya fitar a ranar Litinin.
