Hukumar EFCC mai yaƙi da masu yi wa tattalin arzikin Nijeriya zagon ƙasa ta kama tsohon gwamna Jihar Sokoto Aminu Waziri Tambuwal bisa zargin cin hanci da rashawa.
Jaridun ƙasar sun ambato majiyoyi daga EFCC suna cewa an riƙe da tsohon gwamnan a hedkwatar hukumar da ke Abuja ranar Litinin kan zargin cire naira biliyan 189 ba bisa ƙa’ida ba.
Kazalika wasu jaridun ƙasar sun ruwaito cewar hukumar EFCC ta kama tsohon gwamnan wanda ya taɓa zama shugaban majalisar wakilan ƙasar ne kan yadda ya cire kuɗaɗen daga banki abin da ya saɓa wa dokar haramta sama-da-faɗi da kuɗi ta 2022.
Sai dai Jam’iyyar PDP reshen Jihar Sokoto, a wata sanarwa da ta fitar ranar Talata, ta ce kama tsohon gwamnan Jihar na cike da siyasa.
Baya ga haka, wasu rahotanni sun ce hukumar ta gayyaci Emeka Ihedioha, wanda ya taɓa kasance mataimakin shugaban majalisar wakilan Nijeriya a lokacin da Tambuwal yake shugaban majalisar.
