Watu wasiopungua sita wameuawa na Kikosi cha Rapid Support Forces (RSF), na kusababisha zaidi ya watu 1,000 kuyahama makazi yao, kwa mujibu wa ripoti ya Sudan Tribune iliyochapishwa Alhamisi.
Mashambulizi hayo yaliyofanyika Jumatano yalilenga vijiji viwili, Umm Dreisa na Al-Shaqla, vilivyoko takribani kilomita 40 kusini-magharibi mwa El Obeid, mji mkuu wa jimbo la Kordofan Kaskazini. Shirika la Habari la Sudan Tribune limesema taarifa hizo zilitolewa na vyanzo vya usalama.
Ripoti hiyo imeeleza kuwa watu wengine kadhaa walijeruhiwa au hawajulikani walipo.
Afisa mmoja wa serikali ya jimbo la Kordofan Kaskazini aliiambia Sudan Tribune kuwa ghasia hizo zimesababisha wimbi jipya la watu kuyahama makazi yao. Alisema zaidi ya watu 1,000 walifika El Obeid kwa miguu kufikia Alhamisi mchana.
Kwa mujibu wa afisa huyo, waliowasili walikuwa kutoka familia 215, wakiwemo wanawake, watoto na wazee ambao walitembea umbali wa makumi ya kilomita ili kufika mjini humo.
Baadhi ya waliokimbia makazi yao walipelekwa katika kambi za wakimbizi wa ndani baada ya kuwasili El Obeid.
Afisa huyo pia aliishutumu RSF kwa kufanya vitendo vya ukiukaji dhidi ya wakazi wa vijiji vilivyoko kusini na magharibi mwa mji huo katika siku za hivi karibuni.
Tangu Aprili 2023, RSF imekuwa ikipigana na jeshi la Sudan kutokana na mzozo kuhusu mpango wa kuiunganisha RSF katika jeshi la nchi hiyo.
Mapigano hayo yamesababisha njaa, huku yakichochea mojawapo ya migogoro mikubwa zaidi ya kibinadamu duniani.
Vita hivyo vimeua maelfu ya watu na kusababisha takribani watu milioni 13 kuyahama makazi yao, huku hali ya kibinadamu ikiendelea kuwa mbaya na njaa kuenea katika maeneo makubwa ya Sudan.
