Kusan mutane 1,000 ne suka hallara a Jami’ar Musulunci ta Uganda (IUIU) domin wani babban iftar na bai daya da aka shirya a watan Ramadan. Hukumar hadin gwiwar raya kasa ta Turkiyya (TİKA) ce ta shirya taron tare da jami’ar, inda dalibai daga addinai daban-daban da mazauna yankin suka halarta.
Mahallarta sun ce taron ya samar da damar haduwa da juna tare da kara fahimtar al’adu. Wata daliba mai suna Tracy Mutoni ta ce wannan ne karo na farko da ta halarci irin wannan iftar na bai daya, kuma ta bayyana cewa hakan na taimakawa wajen karfafa fahimtar juna tsakanin mabambantan addinai.
Jakadan Turkiyya a Uganda, Fatih Ak, ya yaba wa jami’ar bisa karbar dalibai daga kowane irin addini. Ya kuma ce Turkiyya na goyon bayan shirye-shiryen da ke inganta zaman lafiya da hadin kai a tsakanin al’umma.
Shugaban jami’ar, Ismail Gyagenda, ya jaddada cewa kofar jami’ar a bude take ga kowa. A lokaci guda kuma, wakilin TİKA a Uganda, Murat Cetin, ya ce hukumar na shirin tallafawa wasu ayyukan ci gaba a kasar, ciki har da samar da na’urorin gwaje-gwaje na zamani ga makarantar likitanci ta Habib da ke jami’ar.
