Iran imekana kuhusika katika njama inayoshukiwa kuwa ya bomu katika kambi ya anga ya Uingereza inayotumiwa na Marekani, baada ya polisi wa kukabiliana na ugaidi wa Uingereza kuwakamata wanaume watano karibu na RAF Fairford kusini magharibi mwa Uingereza.
Ubalozi wa Iran mjini London siku ya Jumatatu “ulikataa kabisa na kulaani vikali” madai ya kuihusisha Tehran na tukio hilo, ukisema taarifa zilizochapishwa na baadhi ya vyombo vya habari vya Uingereza ni “zisizo na msingi na zenye nia ovu.”
Polisi wamesema Jumatatu kwamba washukiwa hao watano, wenye umri kati ya miaka 23 na 25, wote ni raia wa Uingereza wanaoishi jijini London. Walikamatwa kwa tuhuma za makosa yanayohusiana na vilipuzi na kuandaa kitendo cha kigaidi.
Uchunguzi wa kukabiliana na ugaidi
Polisi walipokea taarifa mapema Jumapili baada ya kuripotiwa kuwepo kwa magari matatu meupe ya aina yaliyokuwa yakielekea katika kituo cha Gloucestershire na kuonekana kuwa “ya kutia shaka.” Wataalamu wa kutegua mabomu baadaye walitumwa katika eneo hilo, huku takribani kaya 85 katika kijiji kilicho karibu zikihamishwa kwa muda.
Kitengo cha Polisi cha Kukabiliana na Ugaidi kilisema kinachunguza mazingira ya tukio hilo.
“Ninafahamu sana kiwango cha minong’ono na makisio kuhusu sababu iliyosababisha tukio hili, pamoja na masuala ya kisiasa ya kimataifa yanayoibuka,” alisema Naibu Kamishna Msaidizi wa Polisi Vicki Evans.
“Hata hivyo, kwa wakati huu, naomba Polisi wa Kukabiliana na Ugaidi wapewe nafasi ya kufanya kazi yao kwa uangalifu na kwa uwazi,” aliongeza.
Rais wa Marekani Donald Trump alisema washukiwa hao walikuwa wakichunguzwa kwa muda, na alionekana kuashiria kwamba huenda kukawa na uhusiano na Iran, ingawa hakutoa ushahidi wa kuthibitisha hilo.
Kituo hicho kinatumika kwa operesheni dhidi ya Iran
Tangu Machi, Marekani imepewa idhini ya kutumia RAF Fairford kwa “operesheni maalumu za kujihami dhidi ya Iran.” Tangu wakati huo, vifaa vya kijeshi vya Marekani na ndege za kivita zimeonekana zikitumia kituo hicho. Ni kituo pekee kilicho katika bara la Uingereza kinachotumiwa kwa madhumuni hayo.
Wakazi walisema shughuli za kiusalama na kijeshi katika eneo linalozunguka kituo hicho zimeongezeka katika miezi ya hivi karibuni.
Waziri wa Ulinzi wa Uingereza, Wes Streeting, alisema mkulima wa eneo hilo aliyewataarifu polisi baada ya kuwaona wanaume waliovalia vinyago wakiwa karibu na magari hayo alikuwa na “sehemu tu ya taswira” ya kilichokuwa kinaendelea.
Iran imewahi kuionya Uingereza kuhusu kuruhusu vituo vyake vya kijeshi kutumiwa kwa operesheni za Marekani dhidi ya Iran.
Mnamo Machi, Waziri wa Mambo ya Nje wa Iran, Abbas Araghchi, aliishutumu London kwa “kuweka maisha ya raia wa Uingereza hatarini” kwa kuruhusu vituo hivyo kutumiwa “kwa ajili ya uchokozi dhidi ya Iran.”
