Ijumaa, jaji wa mahakama ya kitaifa aliruhusu utawala wa Rais wa Marekani Donald Trump kuondoa kinga ya kisheria dhidi ya kufukuzwa nchini kwa Wasomali karibu 1,100.
Kinga hizo zilikuwa zimewawezesha kuishi na kufanya kazi nchini Marekani.
Jaji wa Mahakama ya Wilaya ya Marekani, Allison Burroughs, wa Boston, aliiruhusu Idara ya Usalama wa Ndani ya Marekani (DHS) kusitisha hadhi ya “Kinga ya Muda” (TPS) kwa Somalia, baada ya Mahakama ya Juu ya Marekani mwezi Juni kuruhusu utawala huo kukomesha kinga kama hizo kwa maelfu ya watu kutoka Haiti na Syria.
Uamuzi wa Mahakama ya Juu, ulioungwa mkono na walio wengi wenye msimamo wa kihafidhina (kwa uwiano wa kura 6 kwa 3), ulipunguza uwezo wa majaji kupitia upya hatua za DHS chini ya Trump za kukomesha hadhi ya TPS kwa nchi 13 ambazo zilitoa kinga ya kibinadamu ya uhamiaji kwa wahamiaji wanaostahiki kutoka nchi hizo.
Ni kinga ya kisheria kwa Ethiopia pekee iliyosalia.
Mawakili wa walalamikaji na wale wa DHS hawakujibu mara moja maombi ya kutoa maoni.
Wiki iliyopita, majaji wengine wawili waliruhusu utawala huo kukomesha TPS kwa njia hiyo hiyo kwa Sudan Kusini na Myanmar. Ni kusitishwa kwa TPS kwa Ethiopia pekee ndiko bado kumezuiliwa na jaji.
Aliyekuwa Katibu wa Usalama wa Ndani, Kristi Noem, alitangaza mwezi Januari mipango ya kukomesha TPS kwa Wasomali, akisema hali nchini Somalia imeboreka.
Mwezi Machi, Burroughs—ambaye aliteuliwa na Rais wa chama cha Democratic, Barack Obama—alizuia uamuzi wa Noem kuanza kutekelezwa kufuatia kesi iliyofunguliwa na Wasomali wanne na makundi mawili ya utetezi, likiwemo kundi la African Communities Together.
Baada ya Mahakama ya Juu kutoa uamuzi wake, Burroughs alitoa amri mpya iliyoendelea kuzuia kwa muda kusitishwa kwa TPS ya Wasomali hao, huku akitafakari iwapo awaruhusu walalamikaji kupinga hatua ya DHS kwa misingi ambayo haikushughulikiwa katika uamuzi wa Mahakama ya Juu.
