Virusi vya Ebola katika Jamhuri ya Kidemokrasia ya Congo sasa vinasababisha kifo cha mtu mmoja kila baada ya dakika 30, afisa mkuu wa masuala ya kibinadamu wa Umoja wa Mataifa alisema Ijumaa, huku akitoa wito wa kuchukuliwa hatua zaidi za kimataifa.
“Mlipuko huu una kasi kubwa zaidi ya kuenea kuwahi kurekodiwa,” Tom Fletcher, Naibu Katibu Mkuu wa Masuala ya Kibinadamu, alisema katika taarifa.
“Tunahitaji kasi, hatua pana na mshikamano kabla virusi hivi havijatuzidi nguvu zaidi.”
Mlipuko huo umesababisha vifo vya watu wasiopungua 2,128 kati ya maambukizi zaidi ya 4,500 yaliyothibitishwa tangu kutangazwa kwake nchini DRC mnamo Mei 15, na Umoja wa Mataifa tayari umesema kuwa unaelekea kuwa mlipuko mbaya zaidi wa Ebola kuwahi kutokea.
“Ebola inashindikana vita katika Jamhuri ya Kidemokrasia ya Congo. Hatuwezi kuruhusu virusi hivyo viende kwa kasi zaidi kuliko juhudi zetu za kukabiliana navyo,” Fletcher alisema alipokuwa akielezea juhudi za hivi karibuni za kudhibiti virusi hivyo.
‘Watu wengi zaidi wako hatarini’
“Janga hili linasababisha kifo cha mtu mmoja kila baada ya dakika 30,” alisema Fletcher, ambaye alionya kuwa “watu wengi zaidi wako hatarini”.
Fletcher alisema nchi mbalimbali sasa zimetoa michango ya karibu dola milioni 300 kwa mfuko maalum wa kupambana na mlipuko huo.
Baada ya mkutano wa mashirika ya Umoja wa Mataifa, alisema ametenga kiasi kingine cha dola milioni 30.5 kutoka mfuko wa dharura wa Umoja wa Mataifa, ambacho kitaongezwa kwenye dola milioni 24 zilizotengwa awali kusaidia DRC na nchi nyingine nne kukabiliana na mlipuko huo.
Maambukizi yameripotiwa katika majimbo sita ya Jamhuri ya Kidemokrasia ya Congo (DRC), pamoja na nchini Uganda, pia karibu na mpaka na Sudan Kusini.
Fletcher alisema wafanyakazi wa ziada 20 walikuwa wametumwa kwenye “mstari wa mbele” wa mapambano dhidi ya Ebola, lakini bado kulikuwa na uhitaji wa nguvu kazi zaidi.
‘Dunia inahitaji kuamka’
“Tunahitaji kuongeza maradufu idadi ya timu zinazohakikisha mazishi salama na ya heshima, kuongeza mara tatu uwezo wa kutoa matibabu, kuboresha ufuatiliaji wa watu waliotangamana na wagonjwa, na kupeleka mameneja wenye uzoefu zaidi,” alisema Fletcher.
“Muhimu zaidi, ni lazima tukidhi mahitaji makubwa ya maji, usafi, huduma za afya na huduma nyingine za msingi katika eneo hilo.”
Alisema: “Dunia inahitaji kuamka na kuchukua hatua.”
Mlipuko huu wa 17 wa Ebola unasababishwa na aina ya virusi vya Bundibugyo, ambayo haina tiba wala chanjo inayojulikana.
Ebola imesababisha vifo vya zaidi ya watu 15,000 barani Afrika katika kipindi cha miaka 50 iliyopita.
Mlipuko mbaya zaidi wa Ebola, uliotokea kati ya mwaka 2018 na 2020, ulisababisha vifo vya karibu watu 2,300 kati ya visa 3,500 vilivyorekodiwa.
