Ministan noma da dabbobi na Nijar, Kanar Mahaman Elhadj Ousmane, da takwaransa na ƙasar Chadi, ministan dabbobi da kiwo, Farfesa Abderahim Awat Atteib, sun kai ziyara Diffa ranar Litinin domin ƙaddamar da aikin haɗaka na rigakafin dabbobi kan cututtukan da ke addabar dabbobi.
Kamfanin dillancin labaran Jamhuriyar Nijar ya ruwaito cewa za a ƙaddamar da rigakafin ne ranar Talata a ƙauyen Chétimari da ke yankin Diffa a ƙarƙashin jagorancin ministocin biyu.
Za a yi rigakafin ne da zummar ƙarfafa kiwon lafiya da kuma haɗin kan makiyaya tsakanin Nijar da Chadi, ƙasashe biyu da ke da dangantaka ta ƙut da ƙut ta shekaru aru-aru musamman ta fannin dabbobi da makiyaya, in ji kamfanin dillancin labaran ƙasar.
Kazalika kamfanin dillancin labaran ya ruwaito cewa shirin ya nuna niyyar ƙasashen biyu ta haɗa ƙarfi da ƙarfe wajen yaƙar cututtukan dabbobi da ke tsallaken iyakokin ƙasashen biyu da kuma tsare hanyoyin samun makiyaya da masu kiwon dabbobi a ƙasashen biyu.
Wannan haɗin kai a fannin kiwon lafiyar dabbobin wani ci-gaba ne na tattaunawar dangantaka da ƙasashen suka yi tsakanin ranar 3 zuwa 5 ga watan Oktoban 2023, wadda ya mayar da hankali kan shirya gangamin rigakafin.
A ƙarshen wannan tattaunawar an cim ma yarjejeniyar shirya bikin ƙaddamar da gangamin rigakafin dabbobi da zai ratsa kan iyakar ƙasashen biyu a ko wace shekara daga cikin ƙasashen biyu.
Ƙasar Chadi ce ta karɓi baƙuncin bikin ranar 27 ga watan Nuwamba na shekarar 2023 a Liwa a ƙarƙashin jagorancin ministocin ƙasashen biyu inda aka ƙaddamar da shirin rigakafi na haɗin gwiwa na farko domin rage yaɗuwar cututtukan dabbobi a kusa da kan iyakar ƙasar.
A zamansu a garin Diffa, ministocin biyu za su yi taron bita da ma’aikatan jinyar dabbobi da wakilan ƙungiyoyin masu kiwon dabbobi da kuma tattaunawa kan kai komn makiyaya ta kan iyakar ƙasashen biyu, domin zaman lafiya da wadatar makiyaya a yankin Tafkin Chadi.
